|
< terug
De vader van mie vader - Theo Vandael
 Eigelik kumtj dees besjrieving euver 'de vader van mie vader' waal zoe'n twintjig jaor te laat. Al van kleinsaafaan haje wae b'jós allemaol zoe get van: Woe kómme wae vanaaf??
Oos vader waas tieën jaor wiej zie vader veróngelökdje. Es ich trök dink aan d'n tied det ich tieën jaor waas, kan ich mich echt neet veul herinnere. Toen leep waereldoorlog II op zien inj. Van 't hieël verloup van d'n oorlog stuit 'r neet al te veul mie in miene geist. Hiej en dao nog get mer al de rest is verzwónde…weggewistj… Dao zeen inkel nog e paar hoeëgtepuntje…
Wiej wae klein(er) wore begrepe wae neet woeróm det oos vader niks van zie vader wis. Nów snap ich 't zoeveul te baeter. Hae waas hum veul te vreug verloren óm zich daovan nog veul te kónnen herinnere. Hae wis allein mer det 'r vannen Ollenjer kwaam…van Linne. Mer hae heet zich noeëts de mote getruuëstj, de meugelikheid of d'n tied t'r veur g'hadj, óm in Linne te gaon informere nao zien aafkómst. Oos mam haaj aojers, groeëtaojers en kindje zelfs euvergroeëtaojers. Ziej wis woe ze vanaaf kwaam! Ziej haaj tantes en nónkes… naeven en nichte van moder EN vaderskantj. Oos vader kindjen allein mer EINE nónk…nónk Zjang, de broor van zie moder. En ze haaj ouch nog ein anger broor, nónk Riek, dae örges in Duutslandj woeëndjen en wirkdje. Mer dae haaj d'r nog noeëts gezeen. Op famieliejgebeed mót oos vader zich toch mer verrèks ermeudig geveuldj höbbe. Gei wónjer det 'r de naam Van Daal verangerdje in Van Dael mèt AE. Hae deeg daodoor aafstandj van al det ónbekindje…van diej veur hum groeëte ónrechtvaerdigheid.
Nów kan ich det allemaol begriepe! Allein mer spietig det ich nów pas op zeuk bèn gegange nao zien aafkómst. Es ich dit beukske veur zien naas haaj kónne lègke. Hum haaj kónnen aantoeënen det ouch hae van vaderskantj groeëtaojers… euvergroeëtaojers en zelfs euver- euvergroeëtaojers haaj g'hadj… Det haaj hum zeker ein hieël groeët plezeer gedaon!
Theo Van Dael, de zoon van de zoon van de vader van mie vader!
Koop dit boek nu in de leeswinkel!
|
